Баткенде жаракат алгандардын саны 42 адамга жетти - 15 жаштагы кыз каза болду
Саат 15:00гө карата Баткен облусунун ооруканаларына 42 жарадар жеткирилген. Бул тууралуу Саламаттыкты сактоо министрлигинин басма сөз кызматы билдирди.
Баткен облустук бириккен ооруканасында 19 адам, Лейлектин жалпы медициналык борборунда 18 адам жатат, Лейлектен 5 адам Бишкектин ооруканаларына жеткирилген.
Жабыркагандарга медициналык жардам көрсөтүү үчүн Улуттук госпиталдан нейрохирургдар, жалпы хирургдар, кан тамыр хирургдары, анестезиолог-реаниматологдор, торакалдык хирургдар, фельдшердик кызматкерлерден турган үч бригада Баткенге учуп кеткен.
Достук айылынын 15 жаштагы Эльзада Малик кызы снаряд сыныктарынан жаракат алып, жолдо каза болгондугу айтылууда. Бул маалыматты 24.kg-ге жергиликтүү тургундар тастыкташты.
Алардын айтымында, Эльзада үй-бүлөсү менен тажик аскерлеринин аткылоосунан качып баратканда снаряддын сыныгы тийип, көп өтпөй алган жараатынан улам каза болгон. Анын сөөгү Маргун айылына жеткирилген.
Ошондой эле жергиликтүү элдин айтымында, аткылоонун натыйжасында Жаңы-Жер жана Кулунду айыл өкмөттөрүнүн бир нече тургуну жаракат алган.
«Жабыркагандардын арасында жаш балдар көп. Алар шок абалда. Азыр снаряд элди эвакуациялаган кичи автобуска тийгени белгилүү болду. Жабыркагандар эвакуация үчун даярдалган жайларга жеткирилип жатат», – дешти жергиликтүү тургундар.
