Садыр Жапаров Тажикстандын президенти менен сүйлөшүп, аскерлерди чыгаруу боюнча макулдашышты
Президент Садыр Жапаров Тажикстандын президенти Эмомали Рахмон менен мамлекеттик чек аранын кыргыз-тажик тилкесиндеги кырдаал боюнча сүйлөштү, деп маалымдайт Медиаштаб.
Белгиленгендей, мамлекет башчы Рахмон менен Самаркандда өтүп жаткан Шанхай кызматташтык уюмунун саммитинин алкагында жолугушту.
Эки тарап мамлекеттик чек аранын кыргыз-тажик тилкесиндеги кырдаалды талкуулашты. Эки өлкөнүн лидерлери ок атышууну токтотуу жана чек ара линиясынан куралдуу күчтөрдү жана каражаттарды чыгаруу боюнча тиешелүү түзүмдөргө тапшырма берүүнү макулдашты.
Минкаб төрагасынын орун басары – УКМК төрагасы Камчыбек Ташиев менен Тажикстандын УКМК төрагасы Саймумин Ятимов чек арада иш алып барышат, окуянын жагдайларын жана себептерин иликтөө үчүн комиссия түзүлөт.
Ошондой эле президенттер мамлекеттик чек араны делимитациялоо жана демаркациялоо боюнча Кыргызстан менен Тажикстандын өкмөттөр аралык комиссиясынын ишин тездетүү боюнча макулдашышты.
