Ош шаарына Баткен облусунан келген жарандардын саны 5 миңден ашты. Бул тууралуу Ош мэриясынан билдиришти.

Мэриянын басма сөз кызматы билдиргендей, расмий маалымат боюнча Баткен облусунан келген 2.6 миңге жакын адам убактылуу жайларга жайгаштырылган, алардын көбү аялдар жана жаш балдар.

Ал эми расмий эмес маалымат боюнча Баткенден келгендердин саны 5 миңден ашкан. Алардын жарымы жакындарыныкында жана туугандарыныкында жашап жатат.

Ошондой эле Ош шаарынын борбордук аянтында Ош мэриясынын борборлоштурулган штабы иштеп жатканын эскертилди. Бул жерде мэриянын кызматкерлери, активисттер, ыктыярчылар, медицина кызматкерлеринин бригадасы иштеп жатат, ошондой эле кичи автобустар жаңы келген жарандарды убактылуу жайгаштыруу борборлоруна жеткирүүгө даяр.

«Убактылуу жайгаштыруу пункттарына күн сайын мэриянын тиешелүү жетекчилери жана кызматкерлери келип, психологдор, медицина кызматкерлери тиешелүү жардамдарды берип жатышат. Бул иш-чараларга шаардагы жогорку окуу жайлардын жетекчилиги, шаардагы бир катар мейманканалардын администрациялары олуттуу жардам көрсөтүп жатышат», – деп айтылат маалыматта.

Ош мэриясы жардам бергиси келгендердин баарын шаардык борбордук аянтта жайгашкан шаардык штабга кайрылууну суранат. Штаб саат 07:00дөн 23:00гө чейин иштейт.