Беш жыл ичинде табигый кырсыктардан жапа чеккендерге 4 млрд сомдук жардам көрсөтүлгөн
2017-жылдан 2022-жылдын сентябрына чейин жаратылыш кырсыктарынан жабыркагандарга 4 млрд сомдон ашык акча берилген. Мындай маалыматты Финансы министрлиги жазды.
Министликтин маалыматы боюнча, 24.4 миң адамга жардам көрсөтүлгөн. Бузулган үйүн калыбына келтирүү же жаңы турак жай куруу үчүн жаратылыш кырсыктарынан жапа чеккендерге өз тандоосу боюнча 50 миң сом өлчөмүндө кайтарымсыз жардам же 20 жылга чейинки мөөнөткө кайтарылып берилүүчү 200 миң сом берилет.
Финансы министрлиги 2018-жылдан тартып табигый кырсыктардан жапа чеккен калкка акысыз жардам көрсөтүү жана узак мөөнөттүү жеңилдетилген насыяларды берүү функциялары Финминге караштуу Финансы-кредиттик фондго өткөрүлүп берилгенин эске салды.
Ошентип, 2018-жылдан бүгүнкү күнгө чейин аталган фонд тарабынан 4 миң адамга жалпысынан 221 млн сомго ипотекалык насыя жана акысыз жардам берилген. Алардын ичинен 2022-жылдын башынан бери 51 кишиге жалпы суммасы 2.5 млн сомдук ипотекалык насыя жана бир жолку акысыз жардам көрсөтүлгөн.
Каражаттардын жүгүрүүсүн ачык-айкын кылуу максатында каражаттар түздөн-түз алуучулардын эсептешүү счётуна которулат.
