Контрафакт менен күрөшүү үчүн бардык деңгээлдерде өркүндөтүлгөн жана өзгөчө механизмдерди иштеп чыгуу жана киргизүү зарыл. Бул тууралуу “Антиконтрафакт-2022” X юбилейдик эл аралык форумда минкаб төрагасы Акылбек Жапаров билдирди.

Минкаб башчысы белгилегендей, мыйзамсыз өндүрүү, контрафакттык жана фальсификацияланган продукцияны колдонуу тармагында жүгүргөн каражатты баңги заттарды жана курал-жарактарды сатуу, ошондой эле мунай өндүрүүдөн түшкөн киреше менен салыштырууга болот.

«Контрафакт ири өндүрүүчүлөргө гана эмес, кичи жана орто бизнеске да зыян келтирип, ал эми Евразия экономикалык биримдигине мүчө мамлекеттердин бюджети жыл сайын миллиарддап түшө турган потенциалдуу салыктардан куру калып жатат», – деди ал.

Жапаров интеллектуалдык менчик укуктарын коргоо жана контрафакттык продукцияга каршы күрөшүү жаатындагы мыйзамдык базага көңүл бурду.

«Жаңы жагдайлар жана сыноолор контрафакт менен күрөшүүдө бардык деңгээлдерде бир кыйла өркүндөтүлгөн жана өзгөчө механизмдерин иштеп чыгууну жана киргизүүнү талап кылат. ЕАЭБге мүчө мамлекеттердин мамлекеттик органдары менен бизнес-коомчулуктарынын, эл аралык, илимий, билим берүү уюмдарынын, укук ээлеринин, ар кайсы өлкөлөрдүн өндүрүүчүлөрүнүн ортосунда бирдей чыгармачылык кызматташтыкты түзмөйүнчө, продукциянын мыйзамсыз жүгүртүүсүнө натыйжалуу каршы туруу, интеллектуалдык менчик объекттерине болгон укуктарды коргоо мүмкүн эместиги ачык көрүнүп турат», – деп жыйынтыктады ал.