Салык кызматы салык төлөбөгөн батир ээлери жөнүндө билдирүүгө чакырат
Салык кызматы батир же үй ижарага берген жеке жактар КР салык мыйзамдарына ылайык салык төлөөгө милдеттүү экенин эскертет. Бул тууралуу бүгүн, 3-октябрда, Салык кызматынын басма сөз кызматы билдирди.
Кыймылсыз мүлктүн ээси салык төлөө режимин өз алдынча тандайт экендиги айтылды. Салыктарды патенттин, бирдиктүү салыктын (жөнөкөйлөтүлгөн салык салуунун системасы) же жалпы негизде төлөсө болот. Салык төлөнбөгөн учурда мыйзам чегинде чара көрүлөт.
Ушуга байланыштуу Салык кызматы бардык жарандарды турак жайларды салык төлөбөй ижарага бергендер жөнүндө 0312 61 31 89, 0779 61 31 89 (Whatsapp), 116 телефондору боюнча, ошондой эле аймактык салык органдарына билдирүүгө чакырат.
Басма сөз кызматы белгилегендей, 2022-жылдын 8 айында батир же үй бергендер патенттин негизинде 33.9 млн сом салык төлөшкөн. Бул 2021-жылдын ушул мезгилине салыштырмалуу 3.8 млн сомго көп.
Эскерте кетсек, Россияда жарыяланган мобилизацияга байланыштуу россиялыктардын агылып келишинен улам Кыргызстанда кыймылсыз мүлк бир топ кымбаттаган. House.kg сайтынын маалыматы боюнча, мурда чыгарылган жарнамалардын ээлеринин 15%га жакыны акыркы 7 күндүн ичинде ижара акысын орто эсеп менен 162 долларга көтөргөн.
Кыргызстандыктар батирлерин орустарга кымбатыраак ижарага берүү үчүн арендаторлорду кууп чыгып же деги эле батирдин баасын көтөрө башташкан. Жогорку Кеңештин депутаты Дастан Бекешев батирден чыгарылган жарандарга Салык кызматына арыздангыла деген кеңеш берген. Ал ошондой эле батирдин аянтына жараша турак жайды ижара берүүгө салык киргизүүнү сунуштаган.
