2022-жылдын башынан бери “Кепилдик фонд” ААК бизнеске 904 млн сомдон ашык суммага 372 кепилдик берди. Өнөктөш банктар кепилдик менен дээрлик 3.5 млрд сомго насыя беришти. Бул тууралуу фонддун басма сөз кызматы билдирди.

Басма сөз кызматы белгилегендей, кепилдиктердин 50%дан ашыгы айыл чарбаны өнүктүрүүгө (46%) жана айыл чарба продукциясын кайра иштетүүгө (5%) берилген. Кепилдиктердин жалпы санынын 84%га жакыны өлкөнүн аймактарында ишкердикти өнүктүрүүгө багытталган.

«Колдоого алынган тармактарга айыл чарбасы, айыл чарба продукциясын кайра иштетүү, экспортко багытталган жана импорттун ордун толтуруучу тармактар, соода, курулуш, транспорт жана ар кандай кызматтарды көрсөтүү кирет», – деп баса белгиледи фонд.

Эске салсак, 2016-жылдан бери “Кепилдик фонд күрөө жагынан кыйналган ата мекендик ишкерлерге 2.7 миңден ашык кепилдик берген. Кепилдиктердин суммасы 4.3 млрд сомдон ашкан, өнөктөш банктар тарабынан ишкерлерге 15 млрд сомдон ашык насыя берилген.