«Кыргызтеплокоммунэнерго» МИ жабдууларды сатып алуу боюнча ишенимсиз компания менен келишим түзгөн
Бишкек шаарынын Биринчи Май райондук прокуратурасы тарабынан жүргүзүлгөн текшерүүдө Энергетика министрлигине караштуу «Кыргызтеплокоммунэнерго» МИге от казандарды алып келип бере турган болуп келишим түзгөн ишкана, 4.7 млн сомун алып, бирок жабдууларды жеткирип бербегени аныкталган.
Алсак, үстүбүздөгү жылдын апрель айында «Кыргызтеплокоммунэнерго» МИде «Кыргызтеплокоммунэнерго» МИнин «Нарын МПТ» филиалына 2 даана КВм-2,5 МВт от казандарын сатып алуу конкурсу өткөрүлгөн. Бул конкурстун жеңүүчүсү болуп «О.ц.З.К.» ЖЧКсы табылган.
«Кыргызтеплокоммунэнерго» МИ менен аталган ЖЧКнын ортосунда жалпы суммасы 9 млн 499 миң сомдук жабдууларды алып келүү келишими түзүлгөндөн кийин жогоруда аталган коомго 50% өлчөмүндөгү жалпы суммасы 4 млн 749 миң 920 сомду түзгөн алдын ала төлөм төлөнүп берилген.
“Келишимдин шарттарына ылайык, «О.ц.З.К.» ЖЧКсы 2022-жылдын 31-июлуна чейин от казандарды алып келүүгө милдеттүү болгон. Бирок, аталган ЖЧКнын кызматкерлери кызмат абалынан пайдаланып, көрсөтүлгөн мамлекеттик акча каражатын алып, жогорудагы от казандарды сатып алуу үчүн максаттуу пайдаланбастан, бул каражаттарды өзүнө ыйгарып алышкан”, – дейт ИИМ.
Бул факты боюнча прокуратура тарабынан Кылмыш-жаза кодексинин 210-беренеси (“Ишенип берилген мүлктү ыйгарып алуу же коротуу”) менен кылмыш иши козголуп, тергөө амалдары жүргүзүлүүдө.
