Салык кызматы төлөөчүлөрдү акысыз тейлеш керек - болбосо иштен айдалат
Мамлекеттик салык кызматы (МСК) аймактык салык органдарына Бирдиктүү терезелерге кайрылган төлөөчүлөргө иш регламентинде белгиленгендей акысыз негизде гана кызмат көрсөтүүнү тапшырганын билдирди.
Акысыз кызмат көрсөтүүгө маалымкаттарды жана чечимдерди берүү, отчеттун формаларын басып чыгаруу, документтерди ксерокөчүрмөсүн берүү жана башкалар кирет.
Мындан тышкары, аймактык салык органдарынын имараттарына салык төлөөчүлөргө акы төлөө негизинде кызмат көрсөтүүчү башка уюмдарды, ишкерлерди же жеке жактарды (салыктардын жана төлөмдөрдүн суммасын кабыл алган финансы-кредиттик мекемелерден тышкары) жайгаштырбоо тапшырылды.
Салык кызматкерлери тарабынан кандайдыр бир кызмат көрсөткөндүгү үчүн акча каражаттарын алуу, ошондой эле салык органынын имаратында башка уюмдар жана ишкерлер тарабынан акы төлөнүүчү кызматтарды көрсөтүү фактысы аныкталган учурда, жетекчилерге карата жумуштан бошотууга чейинки тартиптик жаза чаралары көрүлөт.
“Салык кызматына кайрылган ар бир салык төлөөчү акысыз негизде салыктык кызмат көрсөтүүнү, анын ичинде консультациялык кызматты пайдаланууга укуктуу. Ар бир салыкчы “салык кызматы – салык төлөөчүнүн кызыкчылыгы үчүн” принцибин бекем карманып, аларга салык милдеттенмелерин өз убагында жана толук өлчөмдө аткаруусуна жардам бериши керек”, – дейт МСКнын төрагасы Абдувапов.
- Мамлекеттик салык кызматы салыкчылардын мыйзамсыз иш-аракеттери байкалган учурда салык төлөөчүлөрдү (0312)613189, (0779)613189 (Whatsapp) ишеним телефонуна кайрылууга чакырат, анда кызматтык иликтөөнүн жыйынтыгы боюнча тийиштүү чаралар көрүлөт.
