Кара-Кече көмүр кенине видеокамералар орнотулат
Кара-Кече көмүр кенине видеокамералар орнотулат жана быйыл 3.5 млн тоннага чейин көмүр казып алуу пландалууда. Бул тууралуу министрлер кабинетинин төрагасы Акылбек Жапаров Жогорку Кеңештин пленардык жыйынында сүйлөгөн сөзүндө билдирди.
«Бүгүнкү күндө Бишкек ЖЭБде 253 миң тонна көмүр жана 4.2 миң тонна мазут бар. Оштогу ЖЭБди, ошондой эле калкты, бюджеттик уюмдарды жана мекемелерди көмүр менен камсыз кылууда көйгөй жок. Отун базаларында көмүр бар. Калктын аяр катмарына бир тоннадан көмүр бекер таратылды. Баткен облусунда жашаган 875 үй-бүлөгө 603.8 тонна көмүр акысыз берилди», – деди ал.
Ошондой эле Жапаров Кара-Кече көмүр кенине видеокамералар орнотулуп, көмүр кениндеги абалды онлайн көзөмөлдөөгө мүмкүнчүлүк түзүлүп жатканын билдирди.
«Быйыл жабдууларды жеткирүү маселеси чечилди: 100 жүк ташуучу жарты вагон сатып алдык. «Кыргызкөмүр» мамлекеттик ишканасына «Айыл Банк» ачык акционердик коому аркылуу 245 млн сомго 54 даана атайын автоунаалар сатылып алынган, дагы 100 даана атайын тоо-кен техникасын лизингдик негизде алуу каралууда.
Эгерде өткөн жылдарда жылына 1.5 млн тоннага чейин көмүр казылып алынса, быйыл 3.5 млн тоннага чейин көмүр казып алуу пландалууда», – деп белгиледи Министрлер Кабинетинин башчысы.
Кошумча окуңуз:
КР көмүрдү экспорттоого убактылуу тыюу салууну көздөөдө
Кыргызстан кышка карата Казакстан, Түркмөнстан жана Өзбекстандан электр энергиясын импорттойт
Кара-Кече көмүр кенинин директорлугуна 33 жаштагы Азамат Караев дайындалды
