Жыл башынан бери тогуз айда 7.2 миңге жакын россиялык жаран КРнын жарандыгын алуу үчүн кайрылган. Бул тууралуу Санариптик өнүктүрүү министри Талантбек Иманов Жогорку Кеңештин Транспорт, коммуникациялар, архитектура жана курулуш боюнча комитетинин жыйынында билдирди.

Анын айтымында, бул убакыт аралыгында өлкөгө 192 миң россиялык келген. Алардын ичинен 603 адам КРнын жарандыгын алса, 7.2 миңи арыз берген.

Талкууда депутаттар РФда жарым-жартылай мобилизация жарыялангандан кийин Кыргызстанга келген россиялыктарга качкын макамын берүүнү сунушташты. Депутат Тазабек Икрамов аларга жарандык берүүгө каршы чыкты.

«Террордук аракеттер болуп жатат дүйнөдө, анан аны уюштургандардын кээ бири КРнын жараны болуп чыгып жатат. Мамлекеттин паспортун саткандан, кимге болсо да бергенден уялышмак. Жарандыкты качып келгендерге эмес, КРга ири инвестиция тартып жаткандарга беришибиз керек», – деди Икрамов.