КР чек арачылары Россияда санкция салынган контрабандалык товарларды кармашты
Казакстан менен чектеш “Кең-Булуң” өткөрмө пунктунда катталбаган жүктүн ири партиясы табылды. Жүктү алып бара жаткан унаа айдоочусу менен кармалды. Бул тууралуу Кыргызстандын Улуттук коопсуздук боюнча мамлекеттик комитетинин (УКМК) Чек ара кызматы билдирди.
Ведомствонун маалыматы боюнча, 20-ноябрда Кыргызстандын жараны айдап бара жаткан Volvo жүк ташуучу унаасы “Кең-Булуң” постуна келген. Айдоочу Казакстанга бараткан.
Чек арачылар унааны жана артындагы жүктү текшеришкен. 30.3 миң бөтөлкө атыр, 2.5 миңден ашык таңгак аялдардын креми, 40 миң көз айнек, 6.3 миң көз айнек кутусу, 4.8 миң көз айнек үчүн каражаттар, 380 кол чатыр, 40 куту тиричилик батарейкасы жана 1 миң таңгак нымдуу салфетка табылган. Мындай ири партиядагы керектөөчү товарлар үчүн айдоочуда эч кандай документтер болгон эмес.
Кыргызстандын чек арачылары айдоочуну, унааны жана ташылган жүктү камакка алышкан. Алдын ала маалыматтар боюнча, кармалган товар болжол менен 42 млн сомго бааланган.
Economist.kg мурда кабарлагандай, 2022-жылдын сегиз айында Кыргызстандан Россияга экспорттун көлөмү эки эсеге өсүп, 445 млн долларды түзгөн. Ошондой эле санкциялык тизмеге кирген товарлардын көлөмү көбөйгөн, анын ичинде парфюмерия, косметика, аялдардын сумкалары бар.
