Санариптик өнүктүрүү министрлиги жана VisionLabs компаниясы жарандарды аралыктан таануу долбоорун ишке ашырууда
Кыргызстандын Санариптик өнүктүрүү министрлиги жарандарды аралыктан идентификациялоо жана верификациялоо платформасын түзүүдө. Долбоорду ведомствого караштуу “Инфоком” ишканасы жана VisionLabs жеке компаниясы ишке ашыра турганын министрлик Facebook-тагы расмий баракчасында билдирди.
«Инфоком» менен VisionLabs ортосунда кызматташуу боюнча меморандумга кол коюлду. Долбоор боюнча Кыргызстанда биометрикалык терминалдар системасы жана калкка мамлекеттик жана финансылык кызматтарды көрсөтүү үчүн атайын программалык камсыздоо түзүлөт.
Идентификация реалдуу убакыт режиминде онлайн сурам боюнча ишке ашат. Система адамды беттин геометриясы боюнча так жана ишенимдүү тааный алат.
Технологияны мамлекеттик кызматкерлерди тестирлөө процессинде, айдоочулук күбөлүк алууда, шайлоо процесстеринде, жашаган жери боюнча каттоодо, паспорт алууда, электрондук кол коюуда, банктык кызматтарды көрсөтүүдө жана мобилдик тиркемелерде санариптик кызматтарды колдонууда пайдалануу пландалып жатат.
