Кыргызстандык Сайкал Жунушова Европадагы 8 мыкты архитектор айымдардын тизмесине кирди
Кыргызстандык Сайкал Жунушова эл аралык DIVIA AWARD 2023 сыйлыгына көрсөтүлгөн Европадагы 8 архитектор аялдын тизмесине кирди, алардын үчөө Швейцариядан. Бул тууралуу ата мекендик порталдардын бири билдирди.
Жыл сайын берилүүчү сыйлык архитектура тармагында жогорку натыйжаларга жетишкен же укмуштуудай чечимдерди ойлоп тапкан жаш айымдарга берилет. Жунушова Швейцариядан көрсөтүлгөн үч айымдын бири болгон.
Кыргызстандык Сайкал Жунушова учурда Швейцарияда жашайт. 2017-жылы ал Винтертур шаарында Oekofacta архитектуралык фирмасын негиздеген жана ал долбоорлорунда дайыма чопо жана жыгач сыяктуу табигый материалдарды колдонууга аракеттенет.
Швейцарияда, Кыргызстанда да бир убакта иштеп жаткан Сайкал жаш кыргыз архитекторлоруна туруктуу курулуш боюнча окуу курстары жана семинарлар аркылуу билим берип, аларга таасир этүүгө үмүттөнөт. Азыр Сайкал Лихтенштейн университетинде студенттерге сабак берет. Анын жумуштарын Сайкалдын бул баракчасынан көрсөңүз болот.
