Кыргызстанга биринчи жолу Сауд Арабиянын аскердик делегациясы келди
Кыргызстан тараптын чакыруусу менен Сауд Арабиянын Башкы штабынын башчысы Фаяяд бин Хамид Аль-Рувайлинин жетекчилиги алдында Бишкекке аскердик делегация келди. Бул тууралуу КРнын Сауд Арабиядагы элчиси Улукбек Марипов билдирди.
Марипов Сауд Арабиянын аскердик жетекчилигинин Кыргызстанга келиши кыргыз-сауд алакаларынын тарыхында алгач ирет болуп жатканын белгиледи. Бүгүн Фаяяд бин Хамид Аль-Рувайли Кыргызстандын коргоо министри Бактыбек Бекболотов менен жолугушту.
“Белгилей кетсем, буга чейин Кыргызстандын коргоо министри Сауд Арабияга сапар менен барган. Анын жүрүшүндө Сауд Арабиянын делегациясы чакыруу алган. Бул сапар Кыргызстан менен Сауд Арабиянын аскердик тармактагы байланышын бекемдөө үчүн жаңы дем берет деп ишенем”, – дейт элчи.
Тараптар аскердик тармактагы эки тараптуу кызматташуу жана коргоо мекемелерининин өз ара кызматташуусунун келечегин талкуулашкан. Ошондой эле сапардын алкагында Фаяяд бин Хамид Аль-Рувайли Коопсуздук кеңешинин катчысы Марат Иманкулов, министрлик жана мекемелердин жетекчилери менен жолугушуп, Кыргызстандын Куралдуу күчтөрүнүн Аскердик институтуна, Бишкектик гарнизондун аскердик бейтапканасына барат.
