Чек арадагы Капчыгай жана Достук айылынын ар бир үйүнө таза суу кирет
Баткен районунун Капчыгай айылындагы ичүүчү таза суу долбоору ишке ашууда. Курулуш үчүн 17 млн 179миң сом каралган. Бул тууралуу президенттин Баткен облусундагы өкүлүнүн басма сөз кызматы билдирди.
Маалыматка ылайык, учурда курулуштун 70% аткарылды. 5 чакырым аралыкка суу түтүктөрү жаткырылды.
Курулуштун аякташы менен 100 үй-бүлө таза суу менен камсыз болот.
Ушундай эле таза суу курулушу 21 млн 444миң сомго Достук айылында курулууда. Аталган айылда жумуш 80% аяктады. Натыйжада 59 үйгө таза суу кирет.
Таза суу курулуштары республикалык бюджеттин эсебинен каржыланууда. Курулушту июль айынын аягына бүткөрүү, пайдаланууга берүү пландалууда.
Бул иш аракеттер 2022-жылдын сентябрында кыргыз-тажик чек арасында болгон куралдуу жаңжалдан соң Капчыгай жана Достук айылдарын жаңыдан куруу боюнча башкы планга ылайык ишке ашууда.
