2026-жылы Кыргызстанда 29-ZOOM видеожаңылыктар сынагы өтөт
Түркиянын жаңылык операторлор ассоциациясынын төрагасы Айтэкин Полател жана түрк маалымат каражаттарынын өкүлдөрү менен КРнын Президенинин басма сөз катчысы Аскат Алагөзов жолугушту. Мындай маалыматты Алагөзов өзүнүн фейсбук баракчасында жарыялады.
Айтымында, жолугушууда түрк тилдүү өлкөлөрдүн маалымат агенттиктери менен телеканалдарынын ортосундагы кызматташууну кеңейтүү, биргелешкен медиа долбоорлорду өнүктүрүү маселелери талкууланды.
Ошондой эле 27 жылдан бери өтүп келген ZOOM эл аралык видеожаңылыктар сынагы тууралуу да пикир алмашуу болуп, бул сынак дүйнөнүн ар кыл өлкөлөрүнөн келген операторлор менен журналисттердин мыкты жаңылык видеолору бааланган ири эл аралык медиа иш-чара болуп калгандыгы белгиленген.
Өткөн жылы бул сынак Бакуда, быйыл Анкарада, ал эми 2026-жылы 29-ZOOM видеожаңылыктар сынагы Кыргыз Республикасында өтмөкчү – деп билдирди А.Алагөзов.
Сынактын шарттары, жол-жобосу тууралуу кошумча маалымат берилиши күтүлүүдө.
