Бишкек мэриясында Япония менен Кыргызстандын кызматташтыгы талкууланды
Борбор калаада Бишкек шаарынын мэринин орун басары Виктория Мозгачева менен Япониянын билим берүү мекемелеринин делегациясынын жолугушуусу болуп өттү. Мэриянын басма сөз кызматынан маалымдагандай, мэрдин орун басары конокторду Кыргызстандын билим берүү мекемелери менен өнөктөштүк мамиле түзүүгө кызыгуу көрсөткөндүгү үчүн япон тарапка ыраазычылык билдирди.
Жолугушууда социалдык чөйрөнүн кызматкерлеринин квалификациясын жогорулатуу, окуучуларды алмашуу жолу менен билим берүү тармагында кызматташуу, ошондой эле бүтүрүүчүлөр үчүн акысыз билим алуу мүмкүнчүлүктөрү менен тааныштыруу маселелери талкууланды.
Өз кезегинде Кобе университетинин өнөр жай, бийлик жана илим боюнча шаардык кызматташуу платформасы" ассоциациясынын башкы катчысы Кен Фуджиока Бишкек менен Кобе шаарларынын кызматташуусу үчүн жогорку потенциалдын бар экенин белгиледи.
Жолугушуунун соңунда тараптар өнөктөштүктү мындан ары да бекемдөөгө жана Бишкек менен Кобе шаарындагы билим берүү мекемелеринин ортосундагы практикалык кызматташтыкты өнүктүрүүгө ишенимин билдиришти.
