Алма көчөттөрүнөн кантип мол түшүм алса болот?
Бүгүн Суу, айыл чарба жана кайра иштетүү министрлигинин Айыл чарба өсүмдүктөрүн жана багбанчылыкты экспертизалоо департаментинин багбанчылык боюнча адиси Нурубек Малабаев М9 карлик көчөтүнүн тамырына уланган алма көчөттөрүнүн өзгөчөлүктөрү тууралуу айтып берди.
Карлик көчөт тамырлары интенсивдүү багбанчылык үчүн колдонулат, бирок мындай бактарды 1 гектарга отургузууда чыгымдар бир топ жогору болот. Ошондуктан, эгер 4–5 гектар аянтка бак отургузууну пландасаңыздар, М9 тамырын колдонсоңор ылайыктуу.
Бул тамыр системасы терең кетпейт, орточо 60–80 сантиметрге чейин гана өсөт жана тамыры назик (морт) болот. Ошондуктан көчөттөрдү сөзсүз түрдө шпалерага бекем байлап, италиялык кыйгач пальмета формасында калыптандыруу керек. Ушундай агротехниканы туура колдонгондо, 1 гектар аянттан 90–100 тоннага чейин түшүм алууга мүмкүнчүлүк бар.
Айыл чарба өсүмдүктөрүн жана багбанчылыкты экспертизалоо департаменти болсо жарым карлик тамыр болгон ММ-106ны колдонууну сунуштайт. Бул көчот тамырында Галавал, Пинк Леди, Джеромини сыяктуу сорттор жакшы өсөт. Бул сорттор келечектүү болуп, мол жана сапаттуу түшүм берүүгө жөндөмдүү.
