Кыргызстанга келген эл аралык акча которуулардын саны былтыркыга салыштырмалуу 21% өстү
2025-жылдын январь-сентябрь айларынын аралыгында жеке адамдардын акча которууларынын таза агымы 2,03 млрд АКШ долларын түздү. Бул 2024-жылдын тиешелүү мезгилине салыштырмалуу 21,07% өскөн. Мындай маалыматты Улуттук банктын Финансы статистикасы жана маалымдоо башкармалыгынын начальниги Айбек Алиев бүгүн басма сөз жыйынынын жүрүшүндө билдирди.
“Акча которуулардын дүң агымы былтыркыга салыштырмалуу 16,14% жогорулап, 2,06 млрд АКШ доллар түптөлгөн. Эл аралык акча которуулардын басымдуу бөлүгү - 92% Россиядан келип түшкөн.”
Кыргызстанда жалпысынан акча которуу менен 20 эл аралык акча которуу системасынын операторлору алектенет. Алардын ичинен эл арасында көбүнчө Астрасенд, Золотая Корона, Money Gram, Юнистрим, Western Union аттуу системалар колдонулат.
Алиевдин айтымында, 2025-жылдын январь-сентябрь айларынын аралыгында акча которуулардын 47,02 пайызы Астрасент системасы аркылуу келген. Андан кийинки орунда Юнистрим жана Золотая корона аркылуу келип түшкөн.
