Улуттук банк эсептик ченди 11%га чейин жогорулатты
КРнын Улуттук банк Башкармасы 24-ноябрда эсептик ченди (негизги ченди) 100 базистик пунтка 11,00 пайызга чейин жогорулатуу чечимин кабыл алды. Бул чечим 25-ноябрдан тартып күчүнө кирет.
Улуттук банктын маалыматына ылайык, 2025-жылдын башынан берки инфляция 7,3%ды, жылдык инфляция 8,9%ды түздү. Баанын өсүшү негизинен сырткы факторлорго — дүйнөлүк азык-түлүк бааларынын кымбаттоосу, региондогу инфляциянын жогору болушу жана импорттук товарлардын наркынын өсүшүнө байланыштуу шартталууда. Ошондой эле күйүүчү майдын, электр тарифтеринин жогорулашы жана ички керектөөнүн күчөшү азык-түлүктөн башка товарлардын кымбатташына таасирин тийгизүүдө.
Өлкөдөгү экономикалык жигердүүлүк жогорку деңгээлде сакталууда. 2025-жылдын январь-октябрь айларында реалдуу ИДӨ 10%га өскөн. Буга кызмат көрсөтүүлөр, курулуш жана өнөр жай секторлору негизги салым кошту. Ички суроо-талаптын күчөшү реалдуу айлык акынын өсүшү, акча которуулардын көбөйүшү жана керектөө насыяларынын кеңейиши менен байланыштуу.
Банк сектору туруктуу бойдон калууда. 2025-жылдын 9 айынын жыйынтыгында банктардын кредит портфели 35,2%га, депозиттик базасы 35,7%га өстү. Депозиттердин долларлашуу деңгээли 35%га чейин төмөндөп, кредиттер боюнча долларлашуу 17,8%га түштү.
Улуттук банк тышкы инфляциялык басымдын уланып жатканына байланыштуу монетардык шарттарды күчөтүү зарылдыгы пайда болгонун белгилейт. Эсептик чендин жогорулатылышы орто мөөнөттүү келечекте инфляцияны 5-7%дык максаттуу диапазондо кармоого багытталган.
Эсептик чен боюнча кийинки пландык чечим 2026-жылдын 26-январында каралат.
