МинКаб АӨБдөн 45 млн доллар насыя, 20 млн грант алуу долбоорун жактырды

Министрлер кабинети 2025-жылдын 5-ноябрындагы №944-т токтому менен Кыргызстан жана Азия өнүктүрүү банкы (АӨБ) ортосундагы "Жеткиликтүү жана энергияны үнөмдүү турак жайга жетүүнү кеңейтүү" долбоору боюнча насыя жана гранттык макулдашуулардын долбоорлорун жактырды.

Документке ылайык, Каржы министри макулдашууларга Кыргыз Республикасынын атынан кол коюу, ошондой эле мазмунун өзгөртпөй турган мүнөздөгү түзөтүүлөрдү жана толуктоолорду киргизүү укугу берилди.

Долбоорго ылайык, анын ишке ашырылышы "Мамлекеттик ипотекалык компаниясы" ААКы (МИК) аркылуу, финансы институттарынын катышуусу менен жүргүзүлөт. Насыялык жана гранттык каражаттар талаптарга жооп берген субзаем алуучуларга ипотекалык субзаемдерди каржылоого багытталат.

Долбоордун алкагында АӨБ тарабынан 24 жылдык мөөнөткө 45 млн доллар жеңилдетилген насыя берүү каралган. Жеңилдетилген мезгил ичинде пайыздык чен жылына 1%, ал аяктагандан кийин 1,5% болот. Пайыздык жана башка төлөмдөр жылына эки жолу — 15-апрелде жана 15-октябрда жүргүзүлөт. Насыянын жабылуу датасы 2032-жылдын 31-марты деп көрсөтүлгөн.

Мындан тышкары, долбоордун шарттарына ылайык ипотекалык субзаемдерди каржылоого багытталуучу $20 млн көлөмүндөгү грант да каралган.