Улуттук банк «Тиллабай» ЖЧКсынын эки лицензиясын кайтарып алды
Кыргыз Республикасынын мыйзамдарынын талаптарын бузгандыгы үчүн «Тиллабай» жоопкерчилиги чектелген коомунун лицензиялары кайтарылып алынды. Бул тууралуу Кыргыз Республикасынын Улуттук банкынан маалымдашты.
Маалыматка ылайык, Улуттук банктын Көзөмөл боюнча комитетинин 2026-жылдын 27-мартындагы чечиминин негизинде аталган компаниянын эки лицензиясы 2026-жылдын 30-мартынан тартып күчүн жоготту.
Тактап айтканда, үчүнчү жактардын пайдасына төлөмдөрдү кабыл алуу жана өткөрүү кызматтарын көрсөтүүгө 2015-жылдын 12-июнунда берилген лицензиясы жана төлөмдөр менен эсептешүүлөр боюнча финансылык маалыматтарды иштеп чыгуу (процессинг жана клиринг) кызматтарына берилген лицензиялар кайтарылып алынды.
Улуттук банк белгилегендей, мындай чаралар өлкөдө төлөм системаларынын коопсуздугун камсыз кылуу жана мыйзам талаптарын сактоо максатында кабыл алынат.
