Миллиондору менен жоюлуп кеткен «Улуу Көчмөндөр мурасы» сыяктуу дагы бир «Аманат» деген ири холдинг түзүлөт
Бийлик “Аманат” Улуттук холдинг компаниясы” ААКты түзүп, анын уставдык капиталына мамлекеттин үлүшү бар чарбалык компанияларды өткөрүп берүүнү көздөөдө. Бул тууралуу Жогорку Кеңештин Транспорт, коммуникациялар, архитектура жана курулуш боюнча комитетинин жыйынында айтылды.
Аталган маселелер боюнча жыйында депутаттарга Экономика жана коммерция министринин орун басары Чыңгыз Макешов менен Мамлекеттик мүлктү башкаруу фондунун төрагасы Мирлан Бакиров маалымат берди.
Депутат Улугбек Ормонов аталган холдингди түзүү кайра эле ашыкча каражатты талап кыларын эскертти.
“Аманат” деп түзүп, ашыкча эле башкаруу коюп жатасыңар. Эмне кереги бар? Мамлекеттик мүлк фонду турса, ортодон эле кайра холдинг түзүп, жетекчисине, штаттагыларга айлык төлөп… Булардын баарын Акционердик коомдор төлөйт да. Ким ойлоп таап жатат өзү? Каяктан чыгып жатат мындай сунуштар? Мүлк фонду эле башкарчу эмес беле? Жетекчи көбөйүп жатат”, – деген депутат 700 млн коротулуп, бирок жоюлуп кеткен “Улуу көчмөндөр мурасы” холдинги жана камакта отурган жетекчисин белгилеп өттү.
Ал эми өз кезегинде ММБФнын төрагасы Бакиров холдингди түзүү президент Садыр Жапаровдун демилгеси экенин айтты.
“Президент чыгарган жарлыкка ылайык, “Аманат” улуттук холдингин түзүү каралган. Келечекте бардык Акционердик коомдорду бир чоң компаниянын астына алып келип, бирдей башкаруу киргизип, директорлор кеңешин кыскартып жана “Аманаттын” уставдык капиталын көтөрүп, аны эл аралык соодага алып чыгууга мүмкүнчүлүк түзүлөт”, – деген Бакиров өкмөткө токтом долбоору киргенин, макулдашуу жүрүп жатканын билдирди.
Эскерте кетсек, комитетте 2023-2025-жылдарга КРда мамлекеттик менчикти менчиктештирүү программасынын долбоору тууралуу жана Мамлекеттештирилген объекттерди натыйжалуу башкаруу жана тескөө боюнча программага өзгөртүүлөрдү киргизүү жөнүндөгү маселелер каралды.
Белгилей кетсек, уставдык капиталы 800 млн сомго чейин көбөйтүлгөн «Улуу көчмөндөр мурасы» улуттук холдинги жоюлууда. Бирок анын уставдык капиталындагы 3.4 млрд сомдун 2.7 млрд сому гана бюджетке кайтарылат.
Ошондой эле 650 млн сом холдингди жоюуга байланыштуу кредиторлордун талаптарын канаатандырууга жумшалат:
- мамлекеттик салык кызматынын алдындагы кен иштетүгө алынган лицензиялар боюнча 638 млн сом;
- компания түзүлгөндөн тарта иштеп келген кызматкерлердин айлык акысы, имараттын ижарасына төлөөгө болжолу менен 20 млн сом жумшалат.
