Садыр Жапаров: "Берекет банк" аркылуу өлкөгө миллиарддаган каражаттар келет"
Президент Садыр Жапаров "Кабар" маалымат агенттигине берген кезектеги маегинде жаңы ачылган "Берекет банк" тууралуу айтып, анын негизделиши дүйнөгө белгилүү Binance компаниясынын ээси Чанпен Чжаонун сунушу менен болгонун билдирди. Анын айтымында, бул - жеке бизнес долбоор аркылуу өлкөгө ири көлөмдөгү инвестициялар тартылат.
Эске салсак, бул банктын ачылышына Президенттин уулу Нурдөөлөт Нургожоев менен ЖКнын мурдагы депутаты Марат Султановдун да тиешеси бар деген маалымат бар.
Өлкө башчысынын билдиришинче, ушул жылдын май айында Чанпен Чжао Кыргызстанда биргелешип санарип банк ачуу сунушун берген. Президент ага аны мамлекеттик банк катары ачууну сунуштаганда ал макул болбой, жеке банк ачуу тууралуу макулдашышкан.
Банктын уюштуруу иштерин жүргүзүүнү экс-чиновник Марат Султановго мамлекет башчы өзү сунуштаган. Марат Султанов менен Чанпен Чжаонун өтүнүчү менен бул ишти алып кетүүгө Президенттин уулу Нурдөөлөт Нургожоев кошулган.
“Чанпен Чжао мырзаны канчалаган мамлекеттер өз өлкөлөрүнө чакырып келтире албай жүрүшөт. Бул кишинин бизге келиши менен ушул банк аркылуу өлкөгө миллиарддаган каражаттар келет. Башка негиздөөчүлөр да кирет бул банкка.
Мамлекетибиз, элибиз бул банктын пайдасын гана көрөт. Зыяны тийбейт. Банк кадимки эле банктардай болот. Бирок, көбүн эсе виртуалдык активдер жана санарип валюталар менен иштеген банк болот”,-дейт бул маегинде.
