Кызматкерлерге зомбулук көрсөткөндөргө жаза күчөтүлдү
Президент Садыр Жапаров “Кыргыз Республикасынын Кылмыш-жаза кодексине өзгөртүүлөрдү киргизүү жөнүндө” мыйзамга кол койду. Мыйзам 2025-жылдын 25-сентябрында Жогорку Кеңеш тарабынан кабыл алынган.
Мыйзамдын максаты — кызматтык же кесиптик милдетин аткарган, ошондой эле коомдук ишмердүүлүк менен алектенген адамдарды мыйзамсыз зомбулук аракеттеринен коргоо.
Анын алкагында Кылмыш-жаза кодексинин 136 жана 280-беренелерине өзгөртүүлөр киргизилип, кызматтык же кесиптик ишин жүзөгө ашырган адамдарга карата зомбулук кылгандар үчүн жоопкерчилик күчөтүлдү:
- Кызматтык милдетти аткарууга байланыштуу жеңил ден соолукка зыян келтирүү үчүн 500–1000 эсептик көрсөткүчкө чейин айып пул;
- Бейбаштык (хулигандык) кылган учурларда 500–1000 эсептик көрсөткүчкө чейин айып пул же 3–5 жылга чейин эркинен ажыратуу.
Мыйзам менен кызматкерлерди жана коомдук ишмерлерди коргоого укуктук база түзүлдү.
