Дохада социалдык өнүгүү маселелери боюнча экинчи дүйнөлүк саммит өтүп жатат
Катар мамлекетинин борбору Доха шаарында социалдык өнүгүү маселелери боюнча экинчи дүйнөлүк саммит өтүп жатат. Ага Кыргызстандан Министрлер Кабинетинин Төрагасынын орун басары Эдил Байсалов, Билим берүү министри Догдуркүл Кендирбаева жана Эмгек, социалдык камсыздоо жана миграция министри Канат Сагынбаевдер катышты.
Саммитке мамлекет жана өкмөт башчылары, эл аралык уюмдардын жетекчилери, жарандык коомдун жана эксперттик коомчулуктун өкүлдөрү жакырчылыкты жоюу, ачкачылык менен күрөшүү жана социалдык адилеттүүлүктү камсыз кылуу боюнча глобалдык аракеттерди талкуулоо үчүн чогулушту.
Ачылыш аземинде сүйлөгөн сөзүндө Эдил Байсалов КРсы Ачкачылыкты жана жакырчылыкты жоюу боюнча глобалдык альянстын максаттарын колдой турганын жана билим берүү, саламаттыкты сактоо жана калктын социалдык жактан коргоо тармагында масштабдуу реформаларды ырааттуу түрдө ишке ашырып жатканын белгиледи.
Саммиттин жыйынтыгында БУУга мүчө мамлекеттердин социалдык саясатты күчөтүү, билим берүүгө жана саламаттыкты сактоого жеткиликтүүлүктү кеңейтүү, ошондой эле туруктуу өнүгүү үчүн ресурстарды мобилизациялоо боюнча жамааттык милдеттенмелерин чагылдырган Саясий декларацияны кабыл алуу пландаштырылууда.
