Кыргыз-тажик чек арасында 115 км 958 метр аралыкка тикенек зым тартылды
Кыргызстан менен Тажикстандын чек арасына зым тартуу иши Лейлек районунун Максат айылынын аймагында уланып жатканын Баткен облустук жетекчилигинин маалыматына шилтеме кылуу менен "Азаттык" жазды.
Маалыматта бүгүнкүгө чейин кыргыз-тажик чек арасынын дээрлик 116 чакырымына зым тартылганы айтылат.
12-ноябрга карата Баткен облусу боюнча 115 км 958 метр аралыкка зым тартылган. Анын ичинен Баткен районунда 84 км 806 метр, Лейлек районунда 31 км 152,5 метр чек ара тосулуп, чек ара тосмосун бойлой 176 чакырым жол салынган.
Быйыл 13-мартта Бишкекте Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери Садыр Жапаров менен Эмомали Рахмон кол койгон.
31-мартта эки президент Тажикстандын Кожент шаарында ратификациялык грамоталар менен алмашуу жөнүндөгү протоколго кол коюшкан. Ратификацияланган үч документтин бири кыргыз-тажик өкмөттөрүнүн суу чарба жана энергетика объектилерине жеткиликтүүлүктү камсыз кылуу боюнча макулдашуу болгон.
