Касымалиев: Кыргызстан динамикалуу өнүгүп жаткан өлкө катары Борбор Азиянын илбирсине айланат

Министрлер Кабинетинин Төрагасы Адылбек Касымалиев БАЭК алкагындагы Кыргызстандын аймактык мүмкүнчүлүктөрүн өнүктүрүү боюнча бизнес-форумга катышты. Иш-чарага Азия өнүктүрүү банкынын президенти Масато Канда да келишти. Бул тууралуу өкмөттүн басма сөз кызматынан билдиришти.

Форумда Касымалиев өлкөнүн акыркы жылдардагы экономикалык жогорку көрсөткүчтөрүн белгиледи. Анын айтымында, экономика төрт жылдан бери 9 %дан жогору темпте өсүп, 2025-жылдын 10 айында ИДП 10 %га жетти. 2024-жылы ИДПнын номиналдык көлөмү 1,5 трлн сомдон ашып, 2021-жылга салыштырмалуу эки эсеге көбөйдү.

Эл аралык валюта фондунун маалыматына ылайык, Кыргызстан 2024-жылы ИДПнын реалдуу өсүшү боюнча дүйнөдөгү алдыңкы беш өлкөнүн катарына кирди. Өсүштүн негизги факторлору – курулуш, өнөр жай, тейлөө тармагы, инвестициялар жана масштабдуу инфраструктуралык долбоорлор.

2025-жылдын алгачкы жарымында 159 миң жаңы жумуш орун түзүлүп, бул өткөн жылга салыштырмалуу 2,9 эсеге көп. Негизги капиталга инвестициялардын көлөмү да 10 айда 18,9 %га өстү. Быйыл Кыргызстандын кредиттик рейтинги «B+» деңгээлине көтөрүлгөнү экономикалык туруктуулуктун көрсөткүчү экени айтылды.

Касымалиев өнөктөштөргө, анын ичинде Азия өнүктүрүү банкы менен БАЭК программасына колдоосу үчүн ыраазычылык билдирди. Ал 2030-жылга чейин өнүктүрүү боюнча Улуттук программада адамга багытталган өсүү модели негизги багыт экенин кошумчалады.

Ал Кыргызстан стратегиялык жайгашуусу, жаш калкы, табигый ресурстары жана либералдуу экономикасы менен инвесторлор үчүн чоң мүмкүнчүлүктөрдү түзөрүн белгилеп, өлкөнү "Борбор Азиянын илбирси" деп атады.

"Келгиле, биргелешип динамикалуу, туруктуу жана гүлдөгөн келечекти куралы", - деп сөзүн жыйынтыктады Адылбек Касымалиев.