Кыргызстан АӨБ менен экономикалык кызматташтыкты бекемдөөгө макулдашты
Министрлер Кабинетинин Төрагасы Адылбек Касымалиев Азия өнүктүрүү банкынын президенти Масато Канда менен жолугушту. Бул тууралуу өкмөттүн басма сөз кызматынан билдиришти.
Жолугушууда өлкөнүн экономикалык абалы, 2030-жылга чейин өнүктүрүүнүн улуттук программасы, климат, энергетика, айыл чарба жана туризм тармактарындагы кызматташуу маселелери талкууланды.
Адылбек Касымалиев акыркы үч жылда экономиканын өсүү темпи орточо 9,0% түзгөнүн, ал эми 2025-жылдын 10 айында ИДПнын өсүшү 10,0%га жеткенин билдирди. Ал өлкөнү 2030-жылга карата индустриялаштыруу, региондук хаб катары өнүктүрүү жана жашыл энергетика, айыл чарба, туризм сыяктуу багыттар боюнча өсүштү камсыздоону көздөп жатканын белгиледи.
Жолугушуунун жыйынтыгында эки тарап бир катар маанилүү келишимдерге кол койду, анын ичинде коомдук имараттарды жашыл трансформациялоо, энергияны үнөмдөөчү турак жайларды куруу жана суу ресурстарын климаттык шарттарга туруктуу кылуу боюнча долбоорлор каралды.
