А.Касымалиев кытайлык инвесторлор менен аз көмүртектүү өндүрүш долбоорун талкуулады
Министрлер Кабинетинин Төрагасы Адылбек Касымалиев кытайлык “Миньшан” компаниясынын делегациясын кабыл алды. Бул тууралуу Өкмөттүн басма сөз кызматынан билдиришти.
Жолугушуунун жүрүшүндө компаниянын өкүлдөрү электр приборлорун, анын ичинде турмуш-тиричилик техникасын өндүрүүгө багытталган аз көмүртектүү технологиялык индустриалдык парк куруу боюнча инвестициялык долбоорун тааныштырышты.
Маалым болгондой, компаниянын индустриалдык парктарды куруу боюнча тажрыйбасы бар жана Кыргызстанда тиешелүү парк түзүүнү максат кылууда.
Өз кезегинде кыргыз тарап аталган инвестициялык долбоорду ишке ашырууга кызыкдар экенин билдирип, компанияга көмөк көрсөтүүгө даяр экенин белгиледи.
