Балдарына мыйзамсыз пособие алган кыргызстандык жазаланды
Сот Кыргызстанда туулган аялды Воркута шаарында мыйзамсыз алынган балдар жөлөк пулун мамлекеттик бюджетке кайтарып берүүгө милдеттендирди. Ал төрт жыл бою балдары үчүн "түндүк" коэффициенти менен эсептелген жөлөк пулдарды алып келген, бирок өзү туруктуу түрдө Москва облусунда жашап турганын Коми Республикасынын прокуратурасынын басма сөз кызматы билдирди.
Маалыматка ылайык, Воркута шаардык соту Кыргызстандын 36 жаштагы жаранын төлөмдөрдү алууда ири өлчөмдөгү алдамчылыкка күнөөлүү деп тапты.
Иштин материалдарынан белгилүү болгондой, аял 2022-жылдан 2025-жылга чейин Коми Республикасы боюнча Пенсиялык жана социалдык камсыздандыруу фондунун бөлүмүнө төрт жашы жете элек баласына ай сайын берилүүчү жөлөк пулдарды дайындоо тууралуу бир нече жолу арыз менен кайрылган.
Ошол эле учурда ал жашаган жери катары Воркута шаарын көрсөткөн, бирок чындыгында балдары менен бирге Москва облусунда туруктуу жашап турган. Натыйжада ал мамлекеттик бюджеттен 1,4 миллион рублдан ашык каражатты мыйзамсыз алган.
Аял өз күнөөсүн мойнуна алып, келтирилген зыяндын бир бөлүгүн кайтарып берген. Сот ага үч жылга шарттуу түрдө эркинен ажыратуу жазасын, үч жылдык сыноо мөөнөтү менен дайындады. Ошондой эле сот прокуратуранын доосун канааттандырып, кыргызстандык аялдан Россия Федерациясынын пайдасына калган зыяндын суммасы — 1,2 млн рубль өндүрүп алууну чечти. Өкүм азырынча мыйзамдуу күчүнө кире элек.
