БУУ Кыргызстандагы экономикалык реформаларды колдоону улантат
Кыргыз Республикасындагы Бириккен Улуттар Уюмунун туруктуу өнүгүү боюнча кызматташтыктын 2023–2027-жылдарга каралган алкактык программасын ишке ашыруу боюнча Стратегиялык координациялык комитетинин жыйыны болуп өттү. Бул тууралуу Өкмөттүн Басма сөз кызматынан билдиришти.
Иш-чарага Министрлер Кабинетинин төрагасы Адылбек Касымалиев, Кыргыз Республикасындагы БУУнун туруктуу координатору Антье Граве, ошондой эле мамлекеттик органдардын жана БУУ агенттиктеринин өкүлдөрү катышты.
Жыйындын жүрүшүндө Министрлер Кабинетинин башчысы өлкө менен БУУнун ортосунда туруктуу өнүгүү багытында активдүү кызматташтык жүрүп жатканын белгиледи. Анын айтымында, Алкактык программа Кыргызстан менен БУУнун өз ара аракеттенүүсүндөгү негизги инструменттердин бири болуп саналат.
Адылбек Касымалиев акыркы жылдардагы өлкөнүн экономикалык көрсөткүчтөрүнө токтолуп, туруктуу өсүш калктын жашоо деңгээлин жогорулатууга өбөлгө түзүп жатканын билдирди.
"Акыркы төрт жылда экономикалык өсүштүн орточо жылдык темпи 10,2%ды түздү. 2025-жылы ИДПнын өсүү темпи 11,1%га жетсе, 2026-жылдын биринчи кварталында экономика 10,1%га өстү. Бул көрсөткүчтөр жаңы жумуш орундарын түзүүгө, эмгек акыларды, пенсияларды жана жөлөк пулдарды көбөйтүүгө мүмкүнчүлүк берүүдө", — деди ал.
Ошондой эле ал жогорку экономикалык өсүштү сактап калууда эл аралык өнөктөштөрдүн, анын ичинде БУУ системасынын колдоосу маанилүү экенин белгилеп, кызматташтыкты мындан ары да бекемдөөгө даяр экенин билдирди.
Өз кезегинде БУУнун Кыргызстандагы туруктуу координатору Антье Граве Стратегиялык координациялык комитет өлкөнүн өнүгүү артыкчылыктарын биргелешип ишке ашырууда маанилүү роль ойной турганын айтты.
"Бириккен Улуттар Уюму Кыргызстанды экономикалык өсүштү калктын жашоо деңгээлин жакшыртууга, туруктуулукту бекемдөөгө жана аялдар, жаштар менен аялуу катмарлар үчүн мүмкүнчүлүктөрдү кеңейтүүгө багыттоодо колдоону улантат", — деди Антье Граве.
Жыйындын алкагында Кыргызстандагы БУУ долбоорлорунун учурдагы жыйынтыктары, ошондой эле өлкөнүн социалдык-экономикалык өнүгүүсүнө багытталган орто мөөнөттүү пландар талкууланды. Иш-чарада мамлекеттик органдардын жана БУУ агенттиктеринин өкүлдөрү тиешелүү баяндамалар менен чыгышты.
