Кыргызстан менен ЕБ кызматташтыктын жаңы багыттарын талкуулашты
Тышкы иштер министринин орун басары Медер Абакиров Европа биримдигинин Борбор Азия боюнча атайын өкүлү, элчи Эдуардс Стипрайс менен жолугушуу өткөрдү.
Тышкы иштер министрлигинин маалыматына ылайык, жолугушуунун жүрүшүндө тараптар Кыргызстан менен Европа биримдигинин ортосундагы кызматташуунун артыкчылыктуу багыттарын талкуулашты.
Атап айтканда, экономика, инвестиция, транспорт жана энергетика тармактарындагы кызматташтык маселелерине өзгөчө көңүл бурулду. Ошондой эле Европа комиссиясынын "Global Gateway" демилгесинин алкагындагы долбоорлорду биргелешип ишке ашырууга кызыкдар экендиктери белгиленди.
Тараптар мындан тышкары "Борбор Азия – Европа биримдиги" форматындагы аймактык кызматташтыкты жана эл аралык күн тартибиндеги актуалдуу маселелерди талкуулап, пикир алмашышты.
Жолугушуунун жыйынтыгында Кыргызстан менен Европа биримдигинин ортосундагы өз ара пайдалуу кызматташтыкты өнүктүрүү максатында туруктуу саясий диалогду улантуу боюнча макулдашууга жетишилди.
