Кыргызстан менен Шаньдун провинциясы кызматташтыкты кеңейтүүгө макулдашты
Президентинин атайын тапшырмалар боюнча атайын өкүлү Бакыт Төрөбаев Кытай Эл Республикасынын Шаньдун провинциясынын ККП комитетинин катчысы Линь У менен жолугушту. Бул тууралуу Өкмөттүн Басма сөз кызматынан билдиришти.
Жолугушууда Кыргызстандын аймактары менен Шаньдун провинциясынын ортосундагы кызматташтыкты кеңейтүү маселелери талкууланды. Тараптар транспорттук инфраструктура, энергетика, өнөр жай, айыл чарба жана логистика тармактарында биргелешкен долбоорлорду ишке ашырууга өзгөчө көңүл бурушту.
Бакыт Төрөбаев Кыргызстан инвестицияларды жана заманбап технологияларды тартууга, ошондой эле Шаньдун провинциясынын ишкер чөйрөлөрү менен кызматташууну өнүктүрүүгө кызыкдар экенин белгиледи.
Өз кезегинде Линь У эки тараптуу мамилелердин жогорку деңгээлин белгилеп, Шаньдун провинциясы Кыргызстан менен соода-экономикалык жана инвестициялык кызматташтыкты мындан ары кеңейтүүгө даяр экенин билдирди.
Жолугушуунун жыйынтыгында тараптар аймактар аралык байланыштарды бекемдөөгө жана өз ара пайдалуу долбоорлорду биргелешип ишке ашырууга даяр экендиктерин ырасташты.
Жолугушуунун соңунда Бакыт Төрөбаев Линь Уга жылуу кабыл алуу үчүн ыраазычылык билдирип, аны Кыргыз Республикасына расмий сапар менен келүүгө чакырды.
