Кыргызстан менен Япония экология тармагындагы кызматташтыкты күчөтөт
Жаратылыш ресурстары, экология жана техникалык көзөмөл министри Акыл Токтобаев Япониянын Кыргыз Республикасындагы Атайын жана Ыйгарым укуктуу Элчиси Хирано Рюити менен жолугушту. Бул тууралуу ведомстводон билдиришти.
Министр элчини Кыргызстандагы дипломатиялык миссиясынын башталышы менен куттуктап, ага ийгиликтерди каалады. Ошондой эле Япония айлана-чөйрөнү коргоо, туруктуу өнүгүү, климаттын өзгөрүшүнө каршы аракеттенүү жана тоо-кен тармагында Кыргызстандын негизги өнөктөштөрүнүн бири экенин белгиледи.
Министрликтин маалыматына ылайык, жолугушууда тараптар экология жана климат жаатындагы эки тараптуу кызматташууну өнүктүрүү, жаратылыш ресурстарын сактоо, экологиялык коопсуздукту чыңдоо жана биргелешкен долбоорлорду ишке ашыруу маселелерин талкуулашты.
Мындан тышкары, жолугушууда тоо-кен тармагындагы кызматташууга өзгөчө көңүл бурулуп, заманбап экологиялык технологияларды жайылтуу, айлана-чөйрөнү коргоо боюнча потенциалды жогорулатуу жана туруктуу өнүгүү максаттарын ишке ашыруудагы өнөктөштүктү кеңейтүү маселелери каралды.
Жолугушуунун жыйынтыгында тараптар өнөктөштүк мамилелерди мындан ары чыңдоого кызыкдар экенин ырастап, экологиялык күн тартибиндеги актуалдуу маселелер боюнча конструктивдүү диалогду жана биргелешкен ишти улантууга даяр экенин билдиришти.
