Башкы прокуратура коррупцияга каршы мамлекеттик стратегиянын аткарылышын талкуулады
Башкы прокуратурада 2025–2030-жылдарга карата Коррупцияга каршы аракеттенүү боюнча мамлекеттик стратегиянын аткарылышына арналган ведомстволор аралык жумушчу топтун отуруму өттү.
Башкы прокуратуранын маалыматына ылайык, жыйынга Президенттин Администрациясынын, Президентке караштуу Коррупцияга каршы ишкердик кеңештин, сот, укук коргоо, көзөмөлдөөчү жана башка мамлекеттик органдардын өкүлдөрү катышты.
Отурумдун жүрүшүндө мамлекеттик стратегиянын 2026-жылдын биринчи жарым жылдыгындагы аткарылышы боюнча мамлекеттик органдардын ишмердүүлүгүнө баа берилди. Ошондой эле айрым иш-чаралардын өз убагында аткарылбай калышынын себептери жана аныкталган кемчиликтер талкууланып, аларды жоюу жана иштин натыйжалуулугун жогорулатуу боюнча тиешелүү чаралар белгиленди.
Ведомстволор аралык жумушчу топтун төрагасы З.К. Акназаров мамлекеттик стратегияда каралган иш-чараларды өз убагында жана сапаттуу аткаруунун маанилүүлүгүн белгилеп, аны ишке ашырууда мамлекеттик органдардын жоопкерчилигине өзгөчө көңүл бурду.
Мындан тышкары, мамлекеттик органдардын жетекчилери үчүн коррупциянын алдын алуу, коррупциялык тобокелдиктерди башкаруу, кызыкчылыктардын кагылышуусун жөнгө салуу жана ички коррупцияга каршы иштерди уюштуруу боюнча практикалык окутуу өткөрүлдү.
Эске салсак, Коррупцияга каршы аракеттенүү боюнча мамлекеттик стратегия Президенттин 2024-жылдын 5-июнундагы №137 Жарлыгы менен бекитилген. Аны ишке ашырууну координациялоо Башкы прокуратура тарабынан жүргүзүлөт.
