Кыргызстан менен Өзбекстан билим берүү жаатындагы кызматташтыкты кеңейтет
Кыргызстандын жана Өзбекстандын жогорку окуу жайларынын ортосундагы билим берүү жана илим тармагындагы кызматташтыкты кеңейтүү маселелери ректорлордун III форумунда талкууланды. Бул тууралуу Министрлер Кабинетинин Басма сөз кызматынан билдиришти.
Маалыматка ылайык, иш-чарага Министрлер Кабинетинин Төрагасынын орун басары Улан Маматканов катышып, эки өлкөнүн стратегиялык өнөктөштүгүндө билим берүү жана илим тармагы өзгөчө орун ээлерин белгиледи.
Форумга Кыргызстан менен Өзбекстандын жогорку окуу жайларынын жетекчилери, мамлекеттик органдардын, илимий жана академиялык коомчулуктун өкүлдөрү катышты.
Улан Маматканов бүгүнкү күндө мамлекеттердин өнүгүүсүнүн негизги ресурсу билим, инновация жана адам капиталы экенин белгилеп, университеттер илимий изилдөөлөрдүн, жогорку квалификациялуу кадрларды даярдоонун жана заманбап технологияларды өнүктүрүүнүн борборлору болушу керектигин айтты.
Ошондой эле ал академиялык мобилдүүлүктү кеңейтүү, биргелешкен билим берүү программаларын жана илимий долбоорлорду ишке ашыруу, эки өлкөнүн жогорку окуу жайларынын ортосундагы кызматташтыкты чыңдоо маанилүү экенин белгиледи.
