Кыргызстан менен Азербайжан Өнүктүрүү фондунун капиталын 200 млн долларга көбөйттү
Азербайжан Республикасынын Президенти Ильхам Алиевдин Кыргызстанга мамлекеттик сапарынын алкагында кыргыз-азербайжан кызматташтыгын кеңейтүүгө багытталган эки маанилүү документке кол коюлду. Бул тууралуу Экономика жана коммерция министрлигинен билдиришти.
Алардын бири — 2022-жылдын 11-октябрында түзүлгөн Азербайжан–Кыргыз Өнүктүрүү фонду жөнүндө макулдашууга өзгөртүү киргизүү тууралуу Экинчи кошумча макулдашуу. Ага ылайык, Фонддун уставдык капиталы 100 млн АКШ долларынан 200 млн АКШ долларына чейин көбөйтүлдү.
Бул чечим инвестициялык долбоорлорду каржылоо мүмкүнчүлүктөрүн кеңейтүүгө жана Кыргызстандын экономикасына азербайжандык инвестицияларды көбүрөөк тартууга шарт түзөрү белгиленди.
Ошондой эле тараптар Кыргыз Республикасынын Министрлер Кабинети менен Азербайжан Республикасынын Министрлер Кабинетинин ортосундагы 2024–2029-жылдарга кызматташуу программасын ишке ашыруу боюнча Жол картасына кол коюшту.
Документте эки өлкөнүн ортосундагы кызматташтыкты тереңдетүүгө багытталган конкреттүү иш-чаралар камтылып, жетишилген макулдашуулардын аткарылышына туруктуу мониторинг жүргүзүү механизми каралган.
