Ош менен Азербайжандын Гянжа шаары кызматташтыкты кеңейтет
Азербайжан Республикасынын Президенти Ильхам Алиевдин Кыргызстанга болгон мамлекеттик сапарынын алкагында Чолпон-Ата шаарындагы "Рух-Ордо" маданий борборунда Ош шаары менен Азербайжандын Гянжа шаарынын ортосунда боордоштук байланыштарды түзүү боюнча меморандумга кол коюлду.
Ош шаардык мэриясынын маалыматына ылайык, иш-чаранын жүрүшүндө Ош шаарынын мэри Жанарбек Акаев менен Азербайжан Республикасынын Кыргыз Республикасындагы Атайын жана Ыйгарым укуктуу Элчиси Латиф Гандилов тиешелүү документтер менен расмий түрдө алмашышты.
Меморандумдун негизинде тараптар шаардык башкаруу, маданият жана башка тармактарда кызматташууну өнүктүрүп, биргелешкен долбоорлорду ишке ашыруу жана өз ара тажрыйба алмашуу боюнча иштерди жүргүзүшөт. Документ ошондой эле эки шаардын ортосундагы достук жана өнөктөштүк мамилелерин бекемдөөгө өбөлгө түзөт.
