Өлкө башчылары Ысык-Көлдө беш жылдыздуу мейманкананы ачышты
Күн мурун президент Садыр Жапаров Азербайжан, Казакстан, Тажикстан, Өзбекстан жана Түркмөнстандын мамлекет башчылары менен бирге Ысык-Көлдүн жээгинде жайгашкан Baku Resort & Spa беш жылдыздуу мейманканасынын расмий ачылыш аземине катышты.
Президенттин администрациясынын маалыматына ылайык, мамлекет башчылары мейманкананын негизги инфраструктуралык объектилерин көрүп чыгып, жайгаштыруу шарттары, функционалдык мүмкүнчүлүктөрү жана ишкердик, маданий, ден соолукту чыңдоо иш-чараларын өткөрүүгө ылайыкташтырылган инфраструктурасы менен таанышышты.
Белгиленгендей, бул долбоор кыргыз-азербайжан инвестициялык кызматташтыгынын натыйжасы болуп саналат. Анын ишке кириши Ысык-Көл облусунун туристтик потенциалын өнүктүрүүгө, жаңы жумуш орундарын түзүүгө, инвестицияларды тартууга жана эки өлкөнүн экономикалык кызматташтыгын чыңдоого өбөлгө түзөт.
Baku Resort & Spa — Ысык-Көлдүн жээгинде жайгашкан заманбап беш жылдыздуу мейманкана комплекси. Анын курамына мейманкана, коттедждер, конгресс-холл, ден соолукту чыңдоо борбору, спорттук жана көңүл ачуучу объекттер, ошондой эле көрктөндүрүлгөн жээк аймагы кирет.
Комплекс жыл бою конокторду кабыл алууга ылайыкташтырылып, эл аралык форумдарды, ишкердик жолугушууларды жана маданий иш-чараларды өткөрүүгө бардык шарттар каралган.
