Садыр Жапаров F1 H2O чемпионаты туризмди өнүктүрүүгө өбөлгө түзөрүн айтты
Кыргызстанда алгачкы жолу өтүп жаткан UIM F1H2O “Суудагы Формула-1” боюнча дүйнө чемпионаты өлкөнүн туристтик потенциалын дүйнөгө таанытууга өбөлгө түзөт. Бул тууралуу Президент Садыр Жапаров кечээ Ысык-Көлдө өткөн дүйнө чемпионатынын расмий ачылыш аземинде айтты.
Президент Садыр Жапаров дүйнө чемпионаты Кыргызстандын эл аралык аброюн чыңдоого жана өлкөнүн туристтик мүмкүнчүлүктөрүн дүйнөгө таанытууга кызмат кыларын белгиледи.
Анын айтымында, бүгүн дүйнө Кыргызстанды жаңыча таанып баштады жана туризм өлкөнүн атаандаштыкка жөндөмдүүлүгүн көрсөтүүчү негизги тармактардын бири болуп саналат.
"Бүгүнкү дүйнө чемпионаты биздин өлкөнүн эл аралык аброюн чыңдоого багытталган ырааттуу саясатыбыздын дагы бир айкын далили болот деп ишенем", — деди мамлекет башчысы.
Президент туристтердин санын көбөйтүү менен катар көрсөтүлүп жаткан кызматтардын сапатын жакшыртуу да маанилүү экенин белгиледи.
"Биз туристтик кызмат көрсөтүүлөрдүн сапатына, коопсуздукту камсыз кылууга, заманбап инфраструктураны өнүктүрүүгө жана чын дилден көрсөтүлгөн меймандостукка өзгөчө көңүл бурабыз. Анткени меймандостук — кыргыз элинин улуттук мүнөзүнүн жана кылымдарды карыткан маданиятынын ажырагыс бөлүгү", — деди ал.
Садыр Жапаров ошондой эле өлкөдө туризмди өнүктүрүүгө багытталган ири долбоорлор ишке ашырылып жатканын белгиледи. Алардын катарында төрт мезгилдүү "Ала-Тоо Резорт" тоо-лыжа кластери жана "Тамчы" атайын финансылык-инвестициялык аймагы бар.
Президенттин айтымында, бул долбоорлор туристтик инфраструктураны өнүктүрүп, жаңы инвестицияларды тартууга жана Кыргызстанды эл аралык деңгээлдеги туристтик борборлордун бирине айлантууга өбөлгө түзөт.
