Кыргыз-орус агроөнөр жай кызматташтыгынын келечеги талкууланды
Бүгүн VIII Кыргыз-Россия экономикалык форумунун жана XII Кыргыз-Россия аймактар аралык конференциясынын алкагында "Айыл чарба тармагындагы кыргыз-орус кызматташтыгынын келечеги" аттуу панелдик сессия өттү. Бул тууралуу Айыл чарба министрлигинин басма сөз кызматынан билдиришти.
Иш-чарада Суу ресурстары, айыл чарба жана кайра иштетүү өнөр жайы министринин орун басары Асылбек Сатывалдиев Кыргызстан Россия менен агроөнөр жай тармагындагы кызматташтыкка өзгөчө маани берерин билдирди.
Анын айтымында, эки өлкөнүн өнөктөштүгүн бекемдөө азык-түлүк коопсуздугун камсыздоого, соода жүгүртүүнү кеңейтүүгө, заманбап технологияларды киргизүүгө жана биргелешкен инвестициялык долбоорлорду ишке ашырууга өбөлгө түзөт.
Панелдик сессияга Кыргызстандын жана Россиянын мамлекеттик органдарынын, бизнес-коомчулуктун, тармактык уюмдардын жана илимий мекемелердин өкүлдөрү катышты. Алар соода-экономикалык кызматташтыкты кеңейтүү, кайра иштетүү өнөр жайын өнүктүрүү, инвестиция тартуу, логистиканы жакшыртуу, заманбап агротехнологияларды жайылтуу жана ветеринардык-фитосанитардык көзөмөлдү күчөтүү маселелерин талкуулашты.
Ошондой эле жыйындын жүрүшүндө Кыргызстандын сапаттуу айыл чарба продукциясын өндүрүү мүмкүнчүлүгү жогору экени белгиленип, биргелешкен өндүрүштөрдү өнүктүрүүгө, өндүрүштүк кооперацияны кеңейтүүгө жана өз ара пайдалуу инвестициялык долбоорлорду ишке ашырууга кызыкдар экени айтылды.
Жыйынтыгында тараптар кыргыз-орус өнөктөштүгүн мындан ары чыңдоого жана агроөнөр жай комплексин туруктуу өнүктүрүүгө багытталган биргелешкен демилгелерди ишке ашырууга даяр экенин билдиришти.
