Кыргызстан Антальяда өтө турган КС31 климаттык конференциясына даярданууда
Кыргызстан үстүбүздөгү жылдын 9-20-ноябрында Түркиянын Анталья шаарында өтө турган Климаттын өзгөрүшү жөнүндө БУУнун Алкактык конвенциясынын Тараптарынын 31-конференциясына (КС31) даярдык көрүүдө. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, министрликте Кыргызстандын делегациясынын КС31ге катышуусуна даярдык көрүү боюнча Уюштуруу комитетинин жыйыны өттү. Ага министрдин орун басары Асель Раимкулова төрагалык кылды.
Жыйында Кыргызстандын конференцияга катышуусунун негизги максаттары жана артыкчылыктуу багыттары, делегацияны даярдоо боюнча иш-чаралар планы жана катышуу форматы талкууланды.
Мындан тышкары, КС31дин алкагында Кыргызстандын улуттук павильонун уюштуруу маселеси каралды. Буга чейин "Кыргыз Экспорт" борбору улуттук павильон уюштуруу боюнча өтүнмө берип, ал конференциянын уюштуруучулары тарабынан жактырылган.
Жыйындын катышуучулары КС31де Кыргызстандын климаттык артыкчылыктарын эл аралык деңгээлде илгерилетүүгө, климаттык каржылоону тартууга, климаттын өзгөрүшүнө адаптациялоого, туруктуу өнүгүүгө жана тоо күн тартибине өзгөчө көңүл буруу зарылдыгын белгилешти.
Талкуунун жыйынтыгында тиешелүү чечимдер кабыл алынды.
