Дүйнөлүк көчмөндөр оюндарына даярдык аяктап калды
Кыргызстанда VI Дүйнөлүк көчмөндөр оюндарына даярдык көрүү иштери акыркы этапка кирди. Бул тууралуу Өкмөттүн басма сөз кызматынан билдиришти.
Министрлер Кабинетинин төрагасынын орун басары Улан Маматканов Оюндарга даярдык көрүү жана өткөрүү боюнча Уюштуруу комитетинин жыйынын өткөрдү.
Жыйында Дүйнөлүк көчмөндөр оюндарынын жалпы программасы, маданий, спорттук жана илимий иш-чаралар, ошондой эле жабылуу салтанатынын концепциясы каралды.
Мындан тышкары, транспорттук логистика, катышуучуларды жайгаштыруу жана аккредитациялоо, медициналык жана санитардык-эпидемиологиялык камсыздоо маселелери талкууланды.
Ошондой эле "Кырчын" этно шаарчасы, Көчмөндөр цивилизациясы борбору, "Рух-Ордо", ипподром жана спорттук аянтчалар сыяктуу негизги объектилердин даярдыгына өзгөчө көңүл бурулду.
Жыйынтыгында тиешелүү мамлекеттик органдарга даярдык иштерин аяктоо боюнча ишти күчөтүү тапшырылды.
