Кыргызстан менен Жапония климат жана экология маселелерин талкуулады
Жаратылыш ресурстары, экология жана техникалык көзөмөл министри Акыл Токтобаев Жапониянын тышкы иштер министринин парламенттик орун басары Эри Арфия менен жолугушту.
Ведомствонун маалыматына ылайык, тараптар айлана-чөйрөнү коргоо, климаттын өзгөрүшүнө каршы күрөшүү, туруктуу өнүгүү жана жаратылыш ресурстарын сарамжалдуу пайдалануу боюнча кызматташтыкты талкуулашты.
Өзгөчө көңүл критикалык мааниге ээ минералдарга бурулуп, бул багытта тажрыйба алмашуу жана технологиялык кызматташтыкты өнүктүрүү мүмкүнчүлүктөрү каралды.
Ошондой эле кадрларды даярдоо, илимий-техникалык кызматташтык, парник газдарынын чыгарылышын азайтуу жана Биргелешкен кредиттөө механизмин (JCM) ишке ашыруу маселелери талкууланды.
Мындан тышкары, абанын сапатын жакшыртуу жана булганууга каршы күрөшүүдө Япониянын тажрыйбасын жана заманбап технологияларын колдонуу мүмкүнчүлүктөрү каралды.
Тараптар тоолуу аймактарды туруктуу өнүктүрүү, экосистемаларды сактоо жана экотуризмди өнүктүрүү боюнча да пикир алышып, кызматташтыкты мындан ары кеңейтүүгө даяр экенин билдиришти.
