Кыргызстан Sinopec компаниясы менен күйүүчү май жеткирүү маселесин талкуулады
Министрлер Кабинетинин төрагасынын орун басары Эрлист Акунбеков Кытайдын Синьцзян-Уйгур автономдуу районуна болгон жумуш сапарынын алкагында Sinopec корпорациясынын директорунун орун басары Тянь Хунбинь менен жолукту. Бул тууралуу Өкмөттүн басма сөз кызматынан билдиришти.
Жолугушууда Sinopec менен Кыргызстандын күйүүчү-майлоочу материалдар тармагында иштеген компанияларынын ортосунда түз байланыштарды түзүү жана Кыргызстанга мунай продуктуларын жеткирүү маселелери талкууланды.
Кыргыз делегациясынын курамына мунай тармагында иш алып барган ондон ашуун компаниянын жетекчилери кирген. Ошондой эле буга чейин келишим түзгөн компанияларга байланыштуу маселелер каралды.
Эрлист Акунбеков Кыргызстан Кытайдан мунай продуктуларын жеткирүүнүн көлөмүн көбөйтүүгө кызыкдар экенин белгиледи. Анын айтымында, бул багыт эки өлкөнүн соода-экономикалык кызматташтыгында чоң мүмкүнчүлүккө ээ.
Өз кезегинде Sinopec корпорациясынын директорунун орун басары Тянь Хунбинь буга чейин түзүлгөн биргелешкен долбоорлорду ишке ашырууга жана мунай тармагындагы жаңы багыттар боюнча кызматташууга кызыкдар экенин билдирди.
Жолугушуунун соңунда жумушчу топтор Кыргызстанга күйүүчү-майлоочу материалдарды жеткирүү, транспорт, бажылык жол-жоболоштуруу, соода жүгүртүү жана башка тиешелүү маселелерди талкуулашты.
