Санкциялык тобокелдиктер: дагы 19 компаниянын ишин токтотуу демилгеленди
Кыргызстанда санкциялык тобокелдиктерди азайтуу максатында дагы 19 юридикалык жакты мажбурлап жоюу боюнча иш башталды. Бул тууралуу Экономика жана коммерция министрлигинин басма сөз кызматы билдирди.
Маалыматка ылайык, президенттин атайын өкүлү Бакыт Сыдыковдун төрагалыгы астында өткөн жумушчу кеңешмеде санкциялык тобокелдиктерге дуушар болушу мүмкүн болгон компаниялардын ишмердүүлүгүнүн жыйынтыктары талкууланды.
Эске салсак, июндун аягында санкциялык тобокелдиги жогору делген 40ка жакын компания аныкталып, аларга тиешелүү текшерүүлөр жүргүзүлгөн.
Талдоонун жыйынтыгында дагы 19 компаниянын ишин токтотуу зарылдыгы аныкталып, аларды мыйзамда белгиленген тартипте мажбурлап жоюу боюнча адилет органдарына кайрылуу жөнөтүлгөн.
Калган компаниялар боюнча текшерүү иштери улантылууда. Анын жыйынтыгы менен мыйзамга ылайык мындан аркы чаралар аныкталат.
Ошондой эле кеңешмеде Улуттук банктын төлөм кызматтары чөйрөсүндөгү көзөмөлдү күчөтүү боюнча маселелер дагы каралды.
Белгиленгендей, июлдан 14-августка чейин мамлекеттик банктар тарабынан бир катар чаралар көрүлгөн.
Атап айтканда, "Элдик Банк" ААКсы болжол менен 109 компания менен ишкер мамилесин токтоткон. Дагы 20га жакын компаниянын эсептерин жабуу иштери жүрүүдө.
Ал эми "АБАНК" ААКсы болжол менен 35 компания менен ишкер мамилесин токтоткон. Дагы 40ка жакын компания тиешелүү текшерүүдөн өтүүдө.
