Кыргызстан менен Азербайжан сот тармагында тажрыйба алмашууну күчөтөт
20-августта Жогорку соттун төрагасынын орун басары Нурлан Мусаев баштаган делегация Азербайжанга иш сапары менен барып, Азербайжандын Жогорку сотунун төрагасы Инам Имдад оглу Керимов менен жолугушту.
Маалыматка ылайык, жолугушууда электрондук документ жүгүртүү, сот иштерин каттоо жана бөлүштүрүү, аралыктан сот отурумдарына катышуу маселелери каралып, жеке маалыматтарды коргоо боюнча тажрыйба алмашуу маселеси талкууланды.
Иш-чарада эки өлкөнүн сотторунун тиешелүү түзүмдөрүнүн ортосунда туруктуу байланыш түзүү, биргелешкен семинарларды өткөрүү жана адистердин тажрыйба алмашуу сапарларын уюштуруу сунушталды.
Тараптар сот адилеттигин санариптештирүү жаатында биргелешкен демилгелерди жана долбоорлорду ишке ашыруу мүмкүнчүлүгүн да карашты.
