Эмгек министрлиги жарым жылдагы ишмердүүлүгүнүн жыйынтыгын чыгарууда
21-августта Бишкекте Эмгек, социалдык камсыздоо жана миграция министрлигинин 2026-жылдын биринчи жарым жылдыгындагы ишмердүүлүгүнүн жыйынтыктарына арналган отурум өтүп жатат. Бул тууралуу министрликтин басма сөз кызматы билдирди.
Коллегиялык отурумга Министрлер Кабинетинин төрагасынын орун басары Улан Маматканов, депутат Гүлнара Баатырова, эмгек, социалдык камсыздоо жана миграция министри Канат Сагынбаев, ошондой эле министрликтин түзүмдүк жана аймактык бөлүмдөрүнүн жетекчилери катышууда.
Маалыматка ылайык, күн тартибинде биринчи жарым жылдыктын жыйынтыктары, казынанын каражаттарын натыйжалуу пайдалануу, балдарды социалдык жактан колдоону өнүктүрүү жана социалдык коргоо тармагындагы долбоорлорду ишке ашыруу маселелери талданып жатат.
Мындан тышкары, миграциялык саясат, эмгек мигранттарынын укуктарын коргоо, аймактык бөлүмдөр менен социалдык мекемелердин иши, жарандардын кайрылууларын кароо жана мамлекеттик кызмат көрсөтүүлөрдүн сапатын жогорулатуу көйгөйлөрү каралууда.
Жыйындын соңунда министрликтин алдыдагы мезгилдеги негизги милдеттери жана ишинин артыкчылыктуу багыттары аныкталат.
